أنا مش قادرة أكمل معاك نفسي أعيش حياة تانية أنا عايزة الطلاق.
سامح رد بهدوء
عايزة تطلقي طب ماشي… بس بشرط واحد.
نرمين اتفاجئت وسألته
إيه هو الشرط
قالها
تخطبلي وأتجوز وحدة تانية وبعد أسبوع من فرحي أطلقك وتكوني إنت اللي طلبتي الطلاق وده يكون العذر قدام الناس.
نرمين طارت من الفرحة.
حست إن دي أسهل طريقة توصل بيها لحلمها…
تبني مستقبل مع حبيبها الغامض وتتخلص من الحياة اللي بقت تخنقها.
على طول دخلت على الفيس وبعتت للعاشق
جوزي وافق! بس بشرط إني أخطب له واحدة ويتجوزها وبعدها نطلق.
العاشق اللي هو سامح نفسه رد وقالها
دي خطوة ممتازة… وافقي بسرعة وأنا مستنيك بفارغ الصبر.
والمسكينة ما كانتش تعرف إنها بتجهز نهايتها بإيديها.
ما إن حصلت نرمين على موافقة سامح حتى انطلقت تنفذ الشرط اللي هي نفسها اعتبرته مفتاح الحرية.
بدأت تسأل صديقاتها عن بنت محترمة تقبل تكون زوجة تانية وفي الوقت نفسه سامح كان مكمل خطته وابتدى فعلا يدور على عروسة مناسبة.
وبسرعة عرف سامح بنت موظفة في منتصف الثلاثينات مطلقة من فترة وعلى درجة عالية من الاحترام والرزانة.
دخل معاها في كلام وحكالها كل شيء… طبعا باستثناء الاتفاق الغريب اللي بينه وبين نرمين.
قالها ببساطة
أنا متجوز لكن زوجتي الأولى موافقة على الزواج ده وهي اللي هتيجي تخطبك.
البنت اتفاجئت لكن لما شافت أسلوبه واحترامه وحست بالجدية وافقت بشرط إنها تشوف الزوجة الأولى بعينيها وتتأكد إنها مش مجبرة.
وفعلا راحت نرمين بخطوات واثقة تخطب العروس الجديدة.
دخلت البيت وقدمت نفسها باحترام وقالت
أنا زوجته الأولى… وهو صريح معايا وإحنا متفاهمين. وأنا شايفة إنه من حقه يعيش حياته وأنا راضية.
البنت وافقت والأهل باركوا وتم تحديد يوم لعقد القران.
وفي المحكمة وقفت نرمين قدام القاضي وقالت بصوت ثابت
موافقة على زواج زوجي من السيدة دي وبكامل إرادتي.
ابتسم القاضي وقالهم
ربنا يتمملكم على خير.
وتم عقد الزواج وسط مباركات الجميع.
الكل فرحان…
العروسة فرحانة إنها هتبدأ حياة جديدة.
سامح فرحان إنه نفذ خطوة من خطته بذكاء.
وحتى نرمين… كانت مبسوطة لأن الطلاق أصبح مسألة وقت بسيط وبتحسب الأيام عشان تخلص من اللي كانت بتسميه قيود زواج قديم.
في الوقت نفسه كانت بتبعت لحبيبها على فيسبوك كل يوم تحكيله التفاصيل وتقول له
خلاص يوم العرس قرب… بعدها نبدأ حياتنا سوا.
والرد دايما كان محفز ومشجع
أنا في انتظارك وكل يوم بعدك عني بيعدي بصعوبة.
استحملي شوية وبعدها هتكوني معايا للأبد.
كانت نرمين بتعيش في وهم كامل وكل اللي حواليها صدقوا إنها بس بتضحي من أجل مستقبلها الجديد.
وهي ما تعرفش إن حياتها كلها ماشية في اتجاه واحد
الهاوية.
بعد ما تم عقد القران رسميا بدأ سامح يجهز شقة العروسة الجديدة.
لكن الغريب والموجع إن كل التجهيزات دي كانت من جيب نرمين!
العفش القديم اللي تعبوا فيه سوا الشقة اللي كتبها باسمها زمان وحتى المهر اللي كانت بتحلم بيه زمان كله بقى للعروسة الجديدة.
سامح كان بيلعب على حبلين ببراعة
ومن بعيد بيشوف مراته الأولى وهي بترتب له حياته من جديد بإيديها من غير ما تحس.
ونرمين كانت في قمة سعادتها!
كانت فاكراه إنه خلاص الحرية قربت الحب الحقيقي في الطريق وحبيبها ما بينامش من الشوق.
كانت بتحسب الأيام وتعد الساعات وكل شوية تدخل على فيسبوك تبعتله
أنا قربت أتحرر من كل حاجة.. ومستنياك نبدأ من جديد.
وكان دايما بيرد بكلام عسل
أنا بحلم باليوم ده.. هنعوض كل اللي فات وهخليكي أسعد ست في الدنيا.
سامح من ورا الشاشة بيضحك بحزن وسخرية في نفس الوقت
وبيسأل نفسه
إزاي واحدة عاقلة تقع في لعبة سخيفة زي دي
إزاي صدقت كل حاجة بسهولة
نرمين كانت عايشة في وهم من صنع عقلها وكان الفيسبوك هو البوابة اللي دخلت منها للعالم الخيالي ده.
أما سامح فكان بيكمل تحضيراته لحفل زفافه.
ولما جه وقت الاتفاق قالها
اسمعي يا نرمين بعد أسبوع من الفرح نروح المحكمة وتتنازلي عن كل حقوقك وأنا أطلقك.
نرمين استغربت وقالت
ليه أتنازل مش اتفقنا إنك هتطلقني
رد
سامح بحكمة متقنة
علشان يبقى الطلاق هادي وبدون مشاكل قانونية وأنا أصلا صرفت على جوازي ده من جيبي ومش عايز مشاكل.
ولو بتحبيني بالجد كوني كريمة في النهاية.
راحت على طول لحبيبها الوهمي تسأله
بيقولي أتنازل عن حقوقي… أوافق
رد عليها كعادته بكل نفاق
طبعا وافقي وأنا هعوضك أضعاف اللي هتتنازلي عنه إحنا هنعيش في سعادة مش هتتخيليها.
وكانت دي آخر دفعة غباء في طريق الانهيار.
نرمين وافقت.
وبكامل إرادتها راحت المحكمة وتنازلت عن كل حقوقها
النفقة والمؤخر ومسكن الحضانة وحتى حقوق أولادها.
وتم الطلاق.
