قبل ما أحكي ليكم حكايتي اعرفكم بنفسي، أنا اسمي أميرة، وعندي خمسة وثلاثين سنة. اتجوزت وأنا عندي اتنين وعشرين سنة، وبعد كام سنة من جوازي خلفت سيف ابني اللي عنده دلوقتي تسع سنين. وفي يوم، كنت قاعدة في شقتي الهادئة، وحماتي كانت مقضية اليوم كله عندي كالعادة. دخلت عليا المطبخ وبصت بطرف عينها وقالت لي:
هو إنتي يا حبيبتي طول اليوم هتفضلي قاعدة كده؟ مش في غداء هتعمليه؟ ولا جوزك وابنك دول اللي هيجوا كمان شوية هياكلوا إيه إن شاء الله يعني؟
رديت عليها بهدوء وأنا بحاول أبتسم عشان ملمسش طرف حد:
أنا مجهزة كل حاجة من أمبارح بالليل يا طنط، ما فيش بس غير إني هسخنها وخلاص، وكل شيء هيبقى جاهز في ثواني.
رفعت حواجبها بضيق وقالت بنبرة استنكار:
أممم! وهما يا حبة عيني كل يوم هياكلوا أكل بايت؟ وأنا أقول الواد وأبوه مش باين عليهم الأكل ليه؟ اتاريهم بياكلوا الأكل البايت اللي من مبارح!
حسيت بدمي بيغلي في عروقي، فرديت بحدة نسبية:
الله! هو في إيه يا طنط؟ بقولك إيه، لو سمحتي، في نظام أنا عملاه للبيت ده، ومش بحب أي حد يلخبطه ليا ولا يتدخل في طريقتي.
قربت بخطوات واسعة وقالت بصوت حاد:
وده بيت ابني! النظام ده يمشي لما ما أبقاش أنا موجودة!
وقامت دخلت المطبخ بغضب وجابت الحلة اللي فيها الأكل. بصيت لها بذهول وقولت:
إنتي واخدة الأكل ورايحة فين يا طنط بس؟
ردت بتعجرف وهي خارجة من المطبخ:
هنزله للبواب ومراته، إنتي تقومي زي الشطارة تعملي أكل طازه لابني وحفيدي! قال عامله الأكل من بالليل وهتسخنه! ده الأكل البايت ده لا بيبقاله لون ولا طعم ولا ريحة! يلا قومي اعملي لنفسك همة واسمعي الكلام، يلا يا حبيبتي اتحركي!
قالت كلامها ونزلت وهي خابطة الباب وراها. حسيت إن صبري خلص تماماً، مسكت تليفوني وكلمت جوزي عمر وقلت له بصوت متقطع من العصبية:
ألو يا عمر! إنت تيجي حالا تشوف ليك صرفة في أمك! أنا بجد تعبت من تصرفاتها دي وتدخلها الدائم في حياتي، مش معقول اللي هي بتعمله ده كل مرة تيجي فيها!
جاوبني بصوت عصبى ومليان لوم:
هو في إيه تاني يا أميرة؟ هو إنتي كل ما تيجي ماما عندنا تفضلي تعملي الشويتين بتوعك دول؟ حرام عليكي يا شيخ؛ ده إنتي بكره هتبقي حمى، ترضي أن حد يعمل فيكي كده برضه؟
اتصدمت من طريقته ورد فعلة، وقلت بصوت عالي:
والله كل ده يا عمر بتقوله لي عشان لسه بشتكي لك منها؟ حتى من غير ما تعرف في إيه حصل الأول؟ بس أنا هقول إيه يعني؟ ما إنت ابن أمك! وعلى فكرة بقى، أنا مش هقولك هي عملت إيه، أبقي تعالي يا حبيبي اسألها، وأنا في بيت أهلي!
قال بقسوة:
عايزة تروحي لأهلك يبقى لوحدك، وتسيبي ابني يا أميرة، وإياكي تزعلي أمي!
قفلت في وشه السكة وأنا بعيط من القهر وقلت بصوت عالي:
داهية تاخدك إنت وأمك في ساعة واحدة!
دخلت بسرعة، أخدت هدومي وهدوم ابني في شنطة، وأنا خارجة لقيت حماتي طالعة في وش’ السلم وبتقولي بسخرية:
على فين يا حبيبتي؟ هو أنا كل ما أتكلم معاكي على مصلحتك تتقمصي وعايزة تاخدي بعضك وتمشي؟
بصيت لها وقسوة الدنيا كلها في عيوني وقلت:
بقولك إكي، أنا سيبالك البيت باللي فيه أهو، اعملي ليهم إنتي يا حبيبتي أكل طازة، وخدي بالك كويس من ابنك وحفيدي!
سيبتها ونزلت وهي واقفة تبرق وبتقول لنفسها:
شوف البت البجحة! قال عايزاني أنا أقف أطبخ! هو أنا كنت لازم أودي الأكل بجد للبواب ومراته؟ بس لا، أنا مش هطبخ! أنا هطلب أكل جاهز من بره وخلاص!
بعد شوية، رجع ابني سيف من المدرسة، وفتحت له حماتي باب الشقة وبابتسامة مصطنعة قالت:
إيه رأيك في المفاجأة الحلوة دي يا سيف؟
بصلها بدموع وعيون تلمع بالحزن وقال بصوت صغير:
حلوة يا تيته.. هي ماما فين؟ أنا عايزها ضروري حالا دلوقتي.
قالت ببرود وخبيث:
أمك زعلت مني وسابت البيت ومشيت يا حبيبي.. هو إنت مالك كده؟
سيف بدموع أكتر:
ليه مشيت بس من غير ما تاخدني معاها؟
ردت بخبيث:
قلت لها تاخدك معاها، قالت لي لا ده متعب ومش ناقصة دوشة، ومشيت على طول!
سيف بص لأسفل وقال بحزن:
ليه كده؟ والله أنا بسمع كلامها وبقول حاضر وبس..
قالت وهي تطبطب عليه بطريقة مصطنعة:
أمك دي مالهاش في تحمل المسؤولية! إنت يا حبيبي ما فيش حد بيحبك قد بابا وتيته، روح بقى غير هدومك لحد ما الأكل اللي طلبناه يجي، وبابا كمان جاي في الطريق.
هز راسه بضعف وقال:
لا، أنا مليش نفس يا تيته، أنا عايز أنام..
ودخل أوضته وفضل يعيط في سكون.
أما عند حماتي، فقعدت تكلم نفسها: “منها لله، مش منككدة على أبني وبس، دي كمان منكدة على حفيدي حتت العيل الصغير!”.
