انفعل جاسر: “نعم؟! أنت بتقولي إيه؟ أنا أتجوز كده؟ أنت تجننتي يا ماما؟” قالت هنادي: “ما هي لو طلعت بنت عمك فعلاً، مش بعيد خالد يكتبلها كل حاجة يا أهبل. وأحنا حنطلع من المولد بلا حمص.” قال جاسر: “أنت مش كنتي عايزة تجوزيني سلمى بنت طنط صباح؟” قالت هنادي: “لو بسمة كانت بنت عمك فعلاً، حيبقى لي عندها أكتر من اللي عند سلمى يا جاسر.”
تنهد جاسر: “مش عارف… حأفكر.” قالت هنادي بمكر: “مش عايزة تفكير! وافق، وبعدين حتلعب بالفلوس لعب.”
في مركز التحليل، كانت بسمة تجلس في قاعة الانتظار، تفرك يديها من التوتر. كان خالد جالساً بالقرب منها، ينتظران النتيجة. قال خالد محاولاً كسر الصمت: “تعالي نطلع نروح كافية أو أي مطعم، لأن التحليل ده بالذات بياخد وقت.” رفضت بسمة بخجل: “لا شكراً لحضرتك.”
قال خالد: “زي ما انتي عايزة. ممكن سؤال؟” قالت بسمة: “طبعاً، تفضل.” قال خالد: “لو كانت النتيجة سلبية، حتعملي إيه؟” قالت بسمة بحزن: “متأكدة إنها حتكون إيجابية… مش بفكر في الاحتمال ده نهائي.”
ابتسم خالد بسخرية: “واثقة جداً!” قالت بسمة: “أكيد، حصل سوء تفاهم بس.” غضب خالد: “سوء تفاهم؟! إني ألاقي شريحة عليها مسجات وسخه، واتفاقات على مواعيد كل مرة في عنوان شكل… يبقى سوء تفاهم؟!”
بكت بسمة: “كل اللي حصل بينكم، أنا ماليش دعوة بيه. اللي عرفته إنك ما سمعتهاش، وما خليتلهاش فرصة تدافع عن نفسها. لا، وكمان طلقتها في المستشفى اليوم اللي أنا نولدت فيه.” تابعت بدموع: “لا مش كده بس… كان لازم تخلي عندك احتمال 1% إني ممكن أكون بنتك، وتعمل تحليل بدل ما ترميني زي ما عملت. أنا على اسم جوز أمي، لو كنت بنتك فعلاً، مش حسامحك ولا هي على اللي عملتوه فيا.”
في هذه اللحظة، خرج الدكتور من غرفة التحليل. ركض إليه خالد وبسمة معاً. سألته بسمة بلهفة: “النتيجة إيه؟” قال الدكتور: “تعالوا بكرا يكون التحليل جاهز، مش هينفع تستنوا هنا على الفاضي.”
حاولت بسمة إقناعه: “ليه بس يا دكتور؟” قال خالد: “خلاص يا بسمة، بكرة نرجع ونشوف التحليل مع بعض.” قالت بسمة بقلق: “بس أنا خايفة يعرفوا و يتزور التحليل.” التفت خالد إلى الدكتور: “اسمع يا دكتور، مش عايز مخلوق يعرف بالموضوع ده نهائي. وأنا عملته هنا، وحأرجع أعمله في مكان تاني. ولو طلعت النتيجة غير اللي طلعت عندك، حأرفع عليك قضية تزوير.”
طمأنه الدكتور: “لا طبعاً، إحنا مركز موثوق. وتأكد حضرتك إن التحليل حيكون صحيح مية بالمية.” قال خالد: “أتمنى تكون قد كلامك. يلا يا بسمة.”
عند باب المركز، قال خالد: “ممكن أوصلك؟” رفضت بسمة: “لا شكراً، حآخد تاكس.” أصر خالد: “اطلعي بس… ومش حأوصلك لغاية البيت، حنزلك أول الحارة.” قالت بسمة: “أنا أسفة، مش عايزة أحرجك.” قال خالد: “ماشي، بس بكرة حنشرب حاجة مع بعض، مهما كانت النتيجة. موافقة؟” قالت بسمة بتردد: “مش عارفة… حنشوف.”
غادر خالد بسيارته، وبقيت بسمة تنظر حتى اختفت السيارة. فتحت حقيبتها فلم تجد نقوداً كافية لتستقل تاكسي. ابتسمت بحزن وهمست لنفسها: “تاكسي؟ هه… أعمل إيه دلوقتي؟ ما كان خليته يوصلني! بدل ما أنا طول عمري ممرمطة في باصات، وبالمرة نجرب نركب عربية شيك. كان لازم أعمل فيها جدعة يعني… آفف.”
تجهت إلى موقف الحافلات، وغادرت إلى بيتها. لكنها فوجئت بأن المفتاح لا يفتح الباب، وطرقت عدة مرات دون رد. سمعت صوت جدتها من خلف الباب وهي تبكي: “روحي يا بسمة… جدك عرف إنك روحتي عند أبوكي، وحلف يمين الطلاق لو عتبتي البيت.”
صُدمت بسمة: “أنت بتقولي إيه يا ستي؟! أروح فين؟” قالت زهرة باكية: “أنا أسفة يا حبيبتي. كلمت جارتنا أم حبيبة، باتي عندها لحد ما يهدى، وبعدين أتكلم معاه مرة تانية.” بكيت بسمة: “ما تعيطيش يا ستي… خلاص، بكرة يهدى وحأرجع.”
ذهبت بسمة إلى بيت الجارة أم حبيبة، لكن حبيبة ابنة الجارة رفضت استضافتها بحجة أن وجودها يجلب النحس. خرجت بسمة إلى الشارع، لا تعرف أين تذهب، وهي تشعر بالوحدة والضياع. مرت الساعات، وأظلم الليل، وجلست على أحد الأرصفة تفكر في مستقبل مجهول.
