ارتعشت حبيبه وهي تقول بخوف: “ولما إنت عارف كده، ورطتني معاك ليه؟ أنا ذنبي إيه في كل ده؟” ثم انهارت في البكاء وهي تقول بخوف: “أنا ذنبي إيه في كل ده يا شريف؟ أنا كنت بعتبرك زي أخويا، ومن خوفي عليك مشيت وراك من غير ما أفكر، ووديت نفسي في داهية، ومبقاش قدامي غير طريق نهايته واحدة: السجن أو الموت.” جلس شريف بجانبها وهو يقول بدهاء وهو يدعي الطيبة: “إسمعي يا حبيبه، أنا وإنتي دلوقتي في مركب واحد. أما إحنا الإتنين نمشي المركب ونوصل لبر الأمان، أو المركب تتقلب بينا ونغرق ونموت، وساعتها مش هيكون لينا مفر.”
قالت حبيبه من وسط دموعها التي تغمر وجهها: “تقصد إيه؟ أنا مش فاهمه.” قال شريف بهدوء: “أقصد إننا بالنسبه للناس دول نكرة، منسواش حاجه، ممكن يطأونا بأقدامهم وكأننا حشرات ولا لنا قيمة. وعشان كده لازم أنا وإنتي نبقى إيد واحدة، نخاف على بعض ونحافظ على مصالح بعض.” قالت حبيبه بدهشة ودموعها تتساقط: “مصالح إيه وإيد واحدة إيه اللي بتتكلم عنهم؟ فوق يا شريف، إحنا لازم نمشي من هنا ونحاول نهرب ونخرج بره البلد قبل ما عمر ده يوصل لنا أو يقبضوا علينا.” قال شريف وهو يشعل سيجارته بهدوء: “إنتي معاكي حق، أنا فعلاً لو لقيت الأمور اتعقدت هسافر، هسافر بس لوحدي.”
انتفضت حبيبه واقفة برعب: “إيه؟ عايز تسافر لوحدك؟ طيب وأنا هتسيبني هنا أتسجن وأتبهدل؟” قال شريف بحنان زائف: “وده برضه معقول؟ أنا بقول لو الدنيا اتعقدت يعني مش دلوقتي خالص. وبعدين أنا قبل ما أفكر في حل لنفسي، أكيد فكرت في حل ليكي إنتي كمان.” نظرت إليه حبيبه بتوتر وهي تعدل من وضع حجابها: “حل، حل إيه؟” ابتسم شريف بمكر وهو يلقي قنبلته الأخيرة عليها: “بصي يا ستي، أنا هبعتك تشتغلي عند ناس معرفة.” ثم تابع وهو يراقب انفعالاتها بهدوء: “ناس أغنياء ومحترمين، هتاخدي منهم مرتب كويس وتلاقي مكان تعيشي فيه بدل الشقة اللي اتطردتي منها، بس بشرط.”
قالت حبيبه وهي تنظر إليه بتوجس: “شرط، شرط إيه؟” ابتسم شريف بقسوة: “…” ارتعشت حبيبه بخوف وهي تسمعه يتابع بهدوء: “بس لو سمعتي كلامي، هخليكي تخرجي منها زي الشعرة من العجين، وأنا بنفسي هخرجك بره البلد، تبتدي حياة جديدة ونضيفة من غير بهذلة ولا قلة.” ثم تغيرت نبرة صوته إلى القسوة الشديدة وهو يتابع بتهديد: “لكن لو رفضتي، أنا بنفسي اللي هبلغ عنك، ومش هكتفي بكده، لا، ده أنا هبلغ عمر الرشيدي بمكانك، وأتأكد إنه هيوصل لك.”
قالت حبيبه بخوف: “بقى دي آخرتها يا شريف؟ عايز تبلغ عني؟ وبعدين تمن إيه اللي عايزني أدفعه؟ مش كفاية كل اللي أنا فيه ده كان بسببك؟” تجاهل شريف حديثها وهو يقف أمامها يتطلع إليها بقسوة وجبروت: “إنتي هتروحي تشتغلي عند عمر الرشيدي في القصر بتاعه.” تراجعت حبيبه للخلف بصدمة والدموع تقفز من عينيها برعب: “إنت اتجننت؟ إنت عارف إنت بتقول إيه؟ عايزني أروح أشتغل عند عمر الرشيدي؟ إنت عايز تسلمني له؟ إنت عارف لو شافني هيعمل فيا إيه؟” لتتابع بخوف هستيري: “أنا مستحيل أعمل كده، فاهم؟ حتى لو بلغت عني البوليس، هيبقى أهون عندي من إني أسلم نفسي له.”
قال شريف بقسوة: “اهدى يا حبيبه، واسمعيني كويس. طول ما إنتي بتسمعي كلامي وتنفذيه، استحالة أبلغ عنك أو أئذيكي.” ثم تابع بثقة: “عمر الرشيدي مش هيعمل فيكي حاجه، لأنه ببساطة مش فاكر أي حاجه.” قالت حبيبه بدهشة: “إيه يعني إيه مش فاكر أي حاجه؟” ثم شهقت وهي تولول بخوف وانهيار: “قصدك الخبطه عملتله حاجه في عقله؟ يا نهار أسود، يا نهار أسود، أنا كنت عارفه الخبطه كانت شديدة قوي، وأكيد مكنش هيقوم منها بالساهل كده.” صرخ فيها شريف يسكتها بغضب: “اخرسي بقى وابطلي ولولة. عمر الرشيدي كويس وزي الحصان، رجع لشغله وحياته وصفقاته.” ابتلعت حبيبه ريقها بخوف وهي تستمع إليه يبتسم بمكر. ثم تابع بتهكم: “أو زي ما الدكاترة بيقولوا، عنده فقدان ذاكرة جزئي.”
صرخت حبيبه باستنكار: “فقدان إيه؟ إيه الكلام الفارغ اللي إنت بتقوله ده؟ إنت فاكرني هبلة وهتضحك عليا بالكلام الفارغ ده؟” جذبها شريف فجأة بقسوة من ذراعها وهو يقول بغضب: “اسمعي، علشان أنا جبت آخري معاكي. قدامك حل من اتنين: إما تستعدي علشان تقضي بقية حياتك في السجن، وده طبعاً لو عمر ما حطش إيده عليكي الأول وخلص على اللي باقي من عمرك، أو تسمعي كلامي وتروحي تشتغلي عنده في فيلته، وكل حاجة تحصل هناك تبلغيني بها.” ثم تابع بتأكيد وهو يشد على ذراعها بقسوة شديدة: “إنتي هتبقي هناك عيني اللي بشوف بها، وأذني اللي بسمع بها، وقبل ده كله هتبقي إيدي اللي بنفذ بها.” ثم تابع وهو يحاول إقناعها: “وقصاد اللي هتعمليه، هتضمني حريتك، ههربك بره البلد، هديكي فلوس تبتدي بها حياتك. والموضوع مش هياخد كام شهر، أنا وإنتي نتحملهم، وفي الآخر كل واحد فينا هياخد اللي هو عايزه، ونتفارق أصحاب وأخوات زي ما كنا، وأحسن كمان.”
قالت حبيبه ودموعها تتساقط بخوف: “أنا خايفة يا شريف، أفرض اتعرف عليا؟” قال شريف بتأكيد: “أنا متأكد إنه مش هيتعرف عليكي. وعشان تتأكدي، أنا روحت له المستشفى وقابلته وعملت نفسي بطمن عليه، وهو قابلني عادي ورجعني الشغل كمان. وده بعد طبعاً ما تحججت له إني سرقت فلوس من الخزنة عشان أعالج أمي واعتذرت وتذللت له، فوافق وأمر لي بفلوس مساعدة كمان. أظن إنه لو كان فاكر حاجه، كان زماني مرمي في السجن أو رجالته خلصوا عليا.” ثم ترك يدها وهو يشعل سيجارة أخرى: “شوفتي، أنا خاطرت بنفسي علشان أتأكد إن حوار فقدانه للذاكرة صحيح، ومش لعبة منه. ها، أظن كده اطمنتي.”
