إن على عمر هنخليه فاكر إنك مخطوبة، علشان لو حبيتي تمشي بعد الشهرين ما يخلصوا، أما لو غيرتي رأيك وحبيتي تكملي، نبقى نعرفه إن مفيش خطوبة ولا حاجة. قالت حبيبه بثقة: “بس أنا متأكدة إني مش هغير رأيي.” ابتسمت دولت هانم وهي تشير للطعام: “متبقيش واثقة أوي كده، سيبي كل حاجة لوقتها. كلي يا حبيبتي، خلينا نخرج للجنينة نشم هوى، النهارده يوم جميل يستحق إننا نقضيه في مكان جميل.”
في وقت متأخر من المساء وبعد مرور أسبوع، وقفت حبيبه في حديقة القصر وهي تتكلم مع شريف في الهاتف بصوت خافت منفعل: “اسمع يا شريف، انساني خالص، وانسى إن أنا شغالة هنا. وأنا أول ما أقدر أسيب المكان من غير ما حد يشك فيا، همشي، ومحدش هيعرف مكاني.” قال شريف بغضب: “اسمعي يا بت، الشويتين بتوع الملاجئ دول تعمليهم على حد غيري؟ إيه، فاكره إنك بعيد عن إيدي؟ لا، فوقي، إنتي لو منفذتيش اللي أنا عايزه، بمكالمة تليفون صغيرة هيكون عمر الرشيدي عارف كل حاجة إنتي عملتيها، وشوفي بقى هيعمل فيكي إيه.” قالت حبيبه بغضب: “طظ طظ فيك وطظ في عمر الرشيدي، طظ فيكم كلكم، وأعلى ما في خيلك اركبه. أنا خلاص مش باقيه على حاجه، هي موتي ولا أكتر.” ثم أغلقت الهاتف في وجهه دون انتظار رده، واستندت على إحدى الأشجار القريبة منها وهي تشعر بدوار شديد. فانتظرت قليلاً حتى هدأت، ثم تنهدت بتوتر وهي تتذكر معاملة عمر الحادة معها، فهو ولسبب لا تعرفه لا يطيق التواجد معها في مكان واحد، فهو ما إن يراه حتى يبدأ في معايرتها بالكلمات بطريقة تخرجها عن شعورها.
تنهدت حبيبه وهي تقول بغضب: “أنا خلاص مبقتش متحمله، هلاقيها منين والا منين؟” ثم اتجهت إلى داخل القصر وهي تنوي الذهاب إلى غرفتها ومحاولة النوم الذي تعلم أنه سيجافيها بعد تهديد شريف لها. دخلت إلى بهو القصر لتتفاجأ بعصمت هانم مازالت مستيقظة وتقف في الظلام، وهي على غير عاداتها تفرك يدها بتوتر شديد. قالت حبيبه بتوتر: “عصمت هانم، في حاجة؟ حضرتك واقفة في الضلمة ليه؟” صرخت فيها عصمت بغضب: “وانتي مالك؟ أقف في الضلمة والا في النور؟ معدش غير الخدامين كمان اللي يحشروا نفسهم في اللي ملهمش فيه.” رفعت حبيبه رأسها وهي تقول بكبرياء: “أنا مش خدامة يا عصمت هانم، وأسفه إني اتدخلت في حاجة مليش فيها.” نظرت لها عصمت باحتقار، في حين تجاهلتها حبيبه واستدارت للذهاب إلى غرفتها. قالت عصمت بلهفة: “استني يا حبيبه.” استدارت لها حبيبه بدهشة وهي تسمعها تتابع برجاء: “إنتي بتعرفي تسوقي؟” نظرت حبيبه لها بدهشة من تبدل لهجتها، فقالت: “أيوه، بعرف، بس مش أوي.” قالت عصمت بلهفة: “طيب، اسمعيني كويس. أنا هديكي عنوان مكان مي هانم بتسهر فيه، هي يعني مش في وعيها، أقصد تعبانة شوية ومش فايقة، فعشان كده محتاجة حد يروح يجبها من هناك. وأنا مش هقدر أروح أجيبها علشان المفروض هنسهر بره أنا وهي وعمر في مكان مهم، وخلاص معدش وقت وعايزة الحق أستعد.” ثم تابعت بأمر: “عايزاكي تروحي تجيبيها وترجعي بسرعة من غير ما حد يحس بيكي.” ثم تابعت بتوتر: “مش عايزة دولت هانم أو عمر بيه ياخدوا خبر باللي هتعمليه، مفهوم؟ وليكي عليا، أديكي مكافأة كبيرة قصاد الخدمة دي.”
