ثم توجهت إلى الجناح الخاص بدولت هانم، لتجدها تجلس في شرفة الغرفة التي تطل على الحديقة الداخلية الرائعة للقصر، وهي تقرأ جرائد الصباح، وقد ارتدت فستاناً رمادياً أنيقاً وعقصت شعرها الأبيض الموشي بخيوط رمادية في عقدة أنيقة خلف رأسها. تأملتها حبيبه وهي تشعر بالحزن والندم يتملكها، وهي تتذكر أن عليها مغادرة هذه السيدة الحنونة الطيبة، التي أشعرتها في الأيام القليلة التي قضتها معها بالحنان والدفء في معاملتها معها، فهي لا تعاملها كمجرد مرافقة لها بل تعاملها بود وحنان شديد كأنها ابنتها أو حفيدتها الصغيرة.
أخذت حبيبه الأدوية الخاصة بدولت هانم وتوجهت إليها وهي تقول بهدوء: “صباح الخير يا دولت هانم، عاملة إيه النهارده؟” ابتسمت دولت هانم بسعادة: “صباح الخير يا حبيبه، كويسة جداً الحمد لله، وحاسة كده إني كلي نشاط، ونفسي مفتوحة على الدنيا.” ثم تابعت بسعادة: “عمر، عمر حفيدي رجع. متعرفيش أنا كنت قلقانه عليه قد إيه، بقاله شهر غايب ومش عارفه عنه حاجه، ولا حد كان بيطمني عليه، وقلبي كان حاسس إن فيه حاجة وحشة حصلت له، بس طلع ده كله وهم من شدة قلقي عليه.” لتتنهد براحة: “الحمد لله إنه سليم وكويس، ربنا يباركلي في عمره.”
وضعت حبيبه حبات الدواء برفقة كوب من الماء على المائدة، وهي تشعر بتأنيب ضمير رهيب، وهي تقول بتوتر: “طيب، الحمد لله إنك اطمنتي عليه. اتفضلي خدي الدوا علشان ميعاده ميفوتش.” ثم تابعت بتوتر: “دولت هانم، أنا كنت عايزة أطلب من حضرتك طلب.” قالت دولت هانم: “اطلبي يا حبيبه، ولو في مقدرتي أكيد هنفذهولك.” قالت حبيبه بارتباك: “أنا كنت عايزة أسيب الشغل هنا… أصل…” ليقاطعها صوت عمر الذي ارتفع من خلفها وهو يقول بجدية: “أصل إيه؟ إزيك يا دوللي، عاملة إيه من غيري؟ أكيد ارتحتي مني ومن تحكماتي، مش كده؟” مررت جدته يدها على رأسه بحنان وهي تقول بحب: “يا حبيبي، ربنا ميحرمنيش منك ولا من تحكماتك، وتفضل منور حياتنا. بس أنا زعلانه منك، تغيب شهر بحاله من غير ما أعرف فيه حاجه عنك.” قال عمر: “غصب عني يا ست الكل، كان عندي شغل مهم ومكنتش أقدر أسيب إلا لما أخلصه، وأول ما خلصته جيت جري عليكي.”
راقبتهم حبيبه وعينيها تترققان بالدموع، فحاولت الانسحاب بهدوء، إلا أن صوت عمر استوقفها وهو يقول بجدية: “استني عندك، رايحة فين؟” قالت حبيبه بارتباك: “رايحة أجيب الفطار لدولت هانم.” هز عمر رأسه وهو يقول بجدية: “وإيه اللي موقفك هنا كل ده؟ أظن الفطار والدوا ليهم مواعيد، ولازم تلتزمي بيهم، والا دول مش من اختصاصك هما كمان.” احمر وجه حبيبه وهي تقول بغضب مكبوت: “لسه ربع ساعه على ميعاد فطار دولت هانم، وأحب أطمن حضرتك أنا عارفه مهام شغلي واختصاصاته كويس وملتزمه بيهم، بس ياريت غيري هو اللي يلتزم بيهم.” تراجع عمر للخلف وهو يضع ساقاً فوق ساق، وهو يتأملها من أعلى إلى أسفل بعينيه وهو يقول ببرود: “ولما إنتي عارفه شغلك وحافظه اختصاصاتك كويس أوي كده، طالبه تسيبي الشغل من غير ما تنفذي شروط العقد اللي إنتي مضياه؟” شحب وجه حبيبه وهي تقول بارتباك: “شروط… شروط إيه اللي حضرتك بتتكلم عليها؟” قال عمر ببرود: “إيه، مش عارفه؟ إنتي مضيتي على إيه؟ مش عارفه إن في شرط في العقد إنك لازم تبلغينا إنك عايزة تستقيلي وتسيبي الشغل قبل تنفيذ الاستقالة بشهرين، وفي حالة موافقتنا على استقالتك، ممكن تمشي بعد شهر واحد.” شهقت حبيبه بخوف: “يعني لسه هستنى شهر؟” ابتسم عمر ببرود: “قصدك شهرين.” قالت حبيبه بدهشة: “إيه؟” قال عمر ببرود: “إيه ودانك تعبانه؟ مش سمعاني كويس؟ بقولك لسه قدامك شهرين، وده لأني مش موافق على استقالتك. إحنا مش بنلعب هنا، وتحت أمرك تشتغلي وقت ما تحبي وتسيبي الشغل وقت ما تحبي.”
نظرت إليه جدته بطرف عينيها وهي تبتسم بمكر: “وانتي عايزة تسيبينا ليه؟ حد دايقك في حاجه؟” قالت حبيبه بارتباك: “لا، بس… أصل…” قالت دولت هانم بحنان: “أصل إيه يا حبيبتي؟ أنا كنت فاكره إنك مرتاحه معانا هنا.” قالت حبيبه بارتباك وهي تحاول العثور على كذبة مقبولة: “أيوه، بس أصل… خطيبي مش موافق على شغلي هنا.” ضيق عمر عينيه وهو يتأمل يدها الخالية من أي شيء يشير لارتباطها، ليهب فجأة واقفاً وهو يقول بصرامة أخافتها: “وإحنا مالنا ومال خطيبك؟ هو إنتي اللي بتشتغلي عندنا والا هو؟” ثم أشار بيده بغضب أثار حيرة جدته: “في عقد ما بينا وإنتي مضيتيه، ولازم تحترميه. قدامك شهرين هتشتغلي هنا فيهم، وبعدها إنتي حرة تعملي اللي إنت عايزاه. وقبل المدة دي ماتخلص، مش عايز أسمع كلام عن استقالتك دي مرة تانية.” ثم تركهم وغادر المكان، وجدته تقول بدهشة: “استنى يا عمر، رايح فين؟ مش هتفطر معايا؟” إلا أنه كان قد غادر بالفعل دون أن يستمع إليها.
