في اسمك وعدد حروفه.
ثم تابع ببرود: “اتفضلي انزلي على أوضتك، أظن ميصحش تكوني هنا في وقت متأخر زي ده.” نظرت إليه حبيبه بعدم تصديق وهي تقول بصدمة: “مش حضرتك… اللي…” قال عمر ببرود وهو يمعن في استفزازها: “حضرتي اللي إيه؟ اتفضلي انزلي أوضتك، ميصحش كده، لو حد شافك هنا في وقت زي ده هيقول إيه.” توهج وجه حبيبه باللون الأحمر من شدة الغضب وهي تكاد تنفجر فيه، ثم توجهت إلى باب الغرفة سريعاً، إلا أن عمر استوقفها: “بيبا، استني.” استدارت حبيبه تنظر إليه بغضب: “نعم، في حاجة تاني؟” إلا أنها تفاجأت به يضع كوب الحليب الساخن في يدها وهو يقول بتسلية: “خدي كوباية اللبن دي معاكي، إشربيها بدل اللي اتكبت، أنا مبشربش لبن.” ثم أشار للباب: “اتفضلي، مستنية إيه، وإقفلي الباب وراكي.” تمسكت حبيبه بكوب اللبن بشدة وهي تخرج وتغلق باب الغرفة بغيظ، تتبعها ضحكات عمر القوية والمستفزة، وهي تتمتم: “أبو شكلك بارد، يا رب عدي الأيام دي بسرعة، خليني أغور من هنا.”
وفي نفس التوقيت، راقبت عصمت هانم، خالة عمر، خروج حبيبه من غرفة عمر بغضب حارق، وهي تقول بحقد: “وده لحق يعرفها إمتى علشان ياخدها الأوضة عنده؟” لتتابع بغيظ: “بس الحق مش عليه، الحق على الغبية بنتي اللي هتضيعه من إيدها بالتصرفات الغبية اللي بتعملها.” ثم تناولت الهاتف وقامت بالاتصال بابنتها، ليأتيها صوت ابنتها المختلط بأصوات الموسيقى العالية والصاخبة.
قالت مي بصوت أشبه بالصراخ: “أيوه يا ماما، في حاجة بتتصلي ليه؟ في حاجه؟” قالت عصمت هانم بغضب: “إنتي لسه عندك؟ بتعملي إيه؟ إحنا بقينا وش الصبح.” قالت مي بضيق: “يوه، لسه بدري يا ماما، الحفلة لسه في أولها، وأصحابي كلهم لسه موجودين.” ضغطت عصمت هانم على الهاتف بغضب: “حفلة إيه اللي بتتكلمي عنها؟ ارجعي بسرعة، عمر وصل، ولو عرف إنك لسه بره، هيتعب الدنيا فوق دماغنا.” شهقت مي بخوف وضيق: “وده إيه اللي رجعه؟ بس ما كنا مرتاحين! خلاص يا ماما، أنا هودع صحابي، ونص ساعة وهكون عندك، بس افتحيلي باب القصر الصغير علشان أدخل منه ومحدش يحس بيا.” قالت عصمت بتأكيد: “أنا هفتحلك الباب، وإنتي متغيبيش، وربنا يستر.” ثم أغلقت الهاتف وهي تقول بارتياح: “كده كويس، نص ساعة بالكتير ومي تبقى هنا. الباقي بقى عليا، لازم بكره أفاتحه في إننا لازم نتمم جوازته من مي اللي اتأجلت بسبب اللي حصله.” ثم تابعت بتفكير وهي تتذكر مشهد خروج حبيبه من غرفة عمر: “لا، البنت دي مش خطر، زيها زي غيرها، أكيد لعبة وبيسلي نفسه بيها، بس لما ينوي يتجوز هيتجوز بنت خالته مي هانم، مندور دا تربية إيدي، وأنا حفظاه كويس.” ثم ابتسمت بثقة وهي تتجه للأسفل لمساعدة ابنتها في الدخول للقصر دون أن يراها أحد.
استيقظت حبيبه مبكراً واغتسلت، ثم ارتدت ملابس العمل ووقفت تحدث نفسها في المرآة بعد أن تأكدت من إحكام حجابها: “خلاص كده يا حبيبه، اتأكدتي إنه مش فاكرك ولا فاكر أي حاجة حصلت في اليوم المشؤوم ده. يعني لو مشيتي واختفيتي، مفيش حد هيدور عليكي إلا الشخص اللي اسمه شريف. بس حتى شريف مش هيضيع وقته في إنه يدور عليا، أكيد بعد ما أخرج من هنا مش هيبقى ليا فائدة عنده، وأكيد مش هيبلغ عني زي ما كان بيهددني، لأنه هيخاف أتكلم ورجله تيجي في السكة، وأكيد ساعتها عمر مش هيرحمه.” لتتابع بتأنيب ضمير: “طيب مش هيبقى حرام عليا لو مشيت من هنا من غير ما أنبهه للتعابين اللي محاوطينه وهو مش حاسس بيهم؟” ثم جلست على طرف الفراش وهي تتابع بقلق، ثم تنهدت بعدم تصديق: “أنا مش مصدقة إن واحدة ممكن تعمل كده في خطيبها وابن خالتها. أنا بجد مش فاهمه، عملت كده إزاي؟ يعني هتعوز إيه أكتر من كده؟” لتتابع بهيام: “وسيم وزي القمر، وراجل كده في نفسه طول بعرض، تحسه هيبة. هو صحيح بارد أوي، بس أكيد هو مش هيعاملها زي ما بيعاملني، ده أكيد بيحبها أوي، وعشان كده عايز يتجوزها.” ثم عقدت حاجبيها بغضب وهي تنهض عن الفراش وتتجه إلى الباب في طريقها للخروج: “غبية ومجرمة، حد ربنا يرزقه بواحد زي ده ويضيعه من إيده ويعمل اللي هي عملته.” ثم تنهدت بتعب: “فوقي يا حبيبه، وخليكي في نفسك، إنتي لوحدك في الدنيا، ولو وقعتي تحت إيده أو إيدهم مش هيرحموكي. يبقى الصح إني أمشي من هنا وبسرعة، قبل الشخص اللي اسمه شريف ما يورطني في مشكلة جديدة من مشاكله، أو عمر يفتكر اللي حصله ويفتكرني، وتبقى مشكلة أكبر. وعشان أريح ضميري، لما أبقى في الأمان هبعت له جواب أحكيله فيه على كل حاجه.” ثم تابعت وهي تحدث نفسها بتشجيع: “صح يا حبيبه، برافو عليكي. أنا هقدم استقالتي لدولت هانم النهارده، وأتحجج لها بأي حجة، وأمشي من هنا لأي مكان تاني. بلاد الله واسعة، وأكيد مش هغلب وهلاقي شغل.” ثم اندفعت لحقيبتها تسحب ملابسها القليلة ووضعتهم فيها، وهي تتأكد من وجود بطاقتها الشخصية ودفتر التوفير الخاص بها المحتوي على مبلغ بسيط من المال ولكن كافٍ لشراء تذكرة قطار لإحدى مدن مصر السياحية البعيدة.
