تراجعت حبيبه للخلف وهي تقول بتقطع: “أنا… أنا شغالة هنا، شغالة، شغالة.” لتنتفض برعب وهو يقاطعها ببرود وقد بدت عليه إمارات الغضب: “شغالة إيه؟ انطقي!” أشارت حبيبه للخلف وهي تقول بارتباك: “شغالة عند نازلي هانم، يعني أقصد شغالة مرافقة ليها.” قال عمر ببرود وقد راق له ملاعبتها: “وبتعملي إيه هنا في وقت زي ده وباللبس اللي إنتي لابساه ده؟ إنتي مش عارفه إنه ممنوع تخرجي من أوضتك في ساعة متأخرة زي دي، ومن غير اليونيفورم بتاعك؟”
استمعت له حبيبه بدهشة وعينيها تتسع برعب، ونظرت إلى منامتها الضيقة والطفولية التي ترتديها بعدم تصديق، وارتفعت يدها إلى رأسها تتحسس شعرها المكشوف والمفرود خلفها بصدمة، لتتفاجأ بها تنظر في كل اتجاه وكأنها تبحث عن شيء ضائع، ثم تندفع فجأة للأمام تزيحه بعنف وتلتقط حجابها الملقى بجانب قدمه، تضعه على رأسها بسرعة شديدة تحاول به مدارة شعرها المنساب بغزارة حول وجهها، إلا أنها تفشل بسبب ارتباكها الشديد. إلا أن صوته الغاضب ارتفع يستوقفها: “إنتي رايحة فين؟ تعالي هنا حالاً، أنا لسه مخلصتش كلامي معاكي.” ابتلعت حبيبه ريقها بخوف وهي تعود إليه صاغرة ويدها تطبق على الحجاب تغلقه حول وجهها بطريقة مضحكة.
قال عمر بصرامة وهو يدرك ارتباكها الشديد: “إسمك إيه؟” قالت حبيبه بهمس: “حبيبه.” رفع عمر حاجبيه بتساؤل وهو يدعي عدم سماعها جيداً: “بيبا، إسمك بيبا؟” هزت حبيبه رأسها بارتباك وهي تقول: “لا، لا، ح… حبيبه.” هز عمر رأسه وهو يتابع ببرود: “هممم، بيبا. طيب يا بيبا، مجاوبتيش عليا، بتعملي إيه هنا في وقت زي ده؟” أشارت حبيبه لنفسها بارتباك: “حبيبه، اسمي حبيبه مش بيبا.” قال عمر ببرود وقد راق له إرباكها: “حبيبه، بيبا، مش مهم. المهم إيه اللي مخرجك من أوضتك في ساعة زي دي وباللبس ده؟” توهج وجه حبيبه باللون الأحمر وهي تشير للمطبخ بارتباك: “أصلي… أصلي كنت مش عارفة أنام، فقلت أجيب حاجة سخنة أشربها، ومعرفش إن يعني حضرتك يعني موجود.” قال عمر وهو يقصد إرباكها: “أه، حاجة سخنة، قصدك اللبن اللي لسه مغرقاني بيه؟” قالت حبيبه: “أنا… أنا آسفة، بس أصل أنا كنت خايفة وفكرتك يعني… آسفة، حرامي.” قال عمر بسخرية: “حرامي هنا في القصر مع كل الحراسة اللي بره دي، وفكرتي إن في حرامي يقدر يدخل هنا؟” توهج وجه حبيبه من الغضب من تهكمه الواضح عليها لترد بدون تفكير: “وفيها إيه يعني؟ ماعادي ممكن أي حرامي يدخل هنا، يعني هو قصر ولا وزارة الدفاع علشان ميقدرش يدخله؟” قال عمر بتحذير بارد: “بقى كده؟” قالت حبيبه باندفاع: “أيوه، وبعدين حضرتك اللي غلطان، كنت واقف في الضلمة وكتفتني بطريقة خوفتني، طبيعي يعني إن أفتكرك حرامي.” قال عمر ببرود: “كده يعني أنا اللي غلطان؟” تراجعت حبيبه بتوتر للخلف من نبرته الباردة: “أيوه، بس أكيد متقصدش.” قال عمر بتهكم: “مقصدش، لا، كتر خيرك.” قالت حبيبه وهي تتراجع للخلف أكثر: “أنا… أنا هروح على أوضتي، تصبح على خير.” قال عمر بصرامة: “استني عندك، أنا أذنتلك تمشي؟” نظرت حبيبه حولها بتوتر: “هو حضرتك لسه عايزني في حاجه؟” قال عمر وهو يتجه إلى الدرج المؤدي للطابق العلوي الموجود به جناحه الخاص: “أه، حضريلي العشا وهاتيه على الجناح بتاعي.” حاولت حبيبه التحكم في غضبها إلا أنها لم تستطع، وهي تقول بتسرع: “حضرتك، أنا مرافقة لنازلي هانم، مش خدامة، وماليش دعوة بأمور المطبخ خالص. تحب أصحيلك حد من الخدم؟” قال عمر ببرود وهو يزيد من استفزازها: “أنا لو كنت عايز حد من الخدم كنت استدعيته. أنا بطلب منك إنتي، وياريت طول ما إنتي هنا تتعلمي إني مبحبش أسمع غير تلات كلمات: نعم، وطيب، وحاضر.” ثم تجاهلها وصعد للأعلى، وهي تنظر إليه بحقد وغضب، ثم استدارت في طريقها للمطبخ، إلا أن صوته البارد استوقفها ليتابع ببرود مستفز: “بيبا، متنسيش وإنتي بتحضري العشا تجيبي معاه كوباية لبن كبيرة.” ثم تابع صعوده وهو يبتسم، وهي تقول بغيظ: “حبيبه، اسمي حبيبه! أعلق يافطة كبيرة باسمي علشان يصدق!” ثم دخلت إلى المطبخ وهي تكاد تصرخ من شدة الغيظ: “أبو شكلك بارد!” ثم تابعت بغيظ وهي تعيد لملمة خصلات شعرها وإعادة ضبط الحجاب مرة أخرى بطريقة جيدة، ثم شرعت في تحضير طعام العشاء وهي تتمتم بغضب: “أنا كده فهمت، الواد شريف مجنون وعمل اللي عمله فيه ليه، أكيد قعد يغيظ فيه لحد ما إختل وعمل عملته السودة.” ثم تنهدت بغضب وهي تحمل صينية الطعام وتتجه بها إلى الأعلى: “ربنا يسامحك يا شريف، إنت السبب في كل المصائب اللي أنا فيها دي.”
وصلت حبيبه إلى جناح عمر وطرقت الباب عدة مرات وهي تكاد تنفجر من الغيظ، حتى سمعت صوته يأذن لها بالدخول. فتحت الباب بتردد وهي تنظر لداخل الغرفة، لتجده يخرج من باب الحمام الداخلي وهو يجفف شعره وقد ارتدى منامة رجالية أنيقة عبارة عن بنطال قطني أسود وتيشرت رمادي بدون أكمام. ابتلعت حبيبه ريقها بتوتر وهي تضع سريعاً صينية الطعام على الطاولة وتتراجع للخلف بتوتر وهي تنوي مغادرة الغرفة، إلا أن عمر استوقفها وهو يتجه إلى صينية الطعام وهو يقول ببرود: “بيبا، استني.” انفجرت حبيبه فيه وقد وصلت إلى أقصى طاقة لتحملها: “حبيبه، اسمي حبيبه! في حرف ح قبل بيبا، تحب أجيب لحضرتك البطاقة علشان تتأكد؟” تناول عمر زيتونة صغيرة وضعها في فمه وهو يمط شفتيه باستفزاز: “حبيبه، بيبا، مش فارقه، إيه هنقعد نتناقش كتير؟”
