أنا أيلين، وجوزوني واحد معرفهوش ولا عمري شوفته قبل كده، وكل ده بسبب أخويا اللي زن عليا ووافق من غير حتى ما يأخذ رأيي في الأول والأخير. بس بعد ما الجواز تم وخلصنا فرحنا ودخلنا بيتنا، عرفت بالصدفة المفاجأة الكبيرة، وهي إن سليم جوزي هو كمان اتجوزني غصب عنه وبسبب أبوه اللي إصر يربطه ويتحمل المسؤولية. يعني باختصار كده، احنا الإتنين اتظلمنا ودخلنا القفص ده بسبب اهلنا.
المهم، من أول يوم جواز لينا واحنا اتفقنا نعمل هدنة؛ هو في أوضة لحاله وأنا في أوضة تانية لوحدي، ومش بنتكلم مع بعض أبدا ولا كأننا جواز نهائي غير للضرورة القصوى وبأضيق الحدود. عليا شغل البيت وروتينه، وهو عليه شغله الخاص اللي بياخد كل وقته وبره البيت طول اليوم، واسمي أيلين وهو اسمه سليم. قعدنا على الحال ده أكتر من 8 شهور كاملة عايشين أخوات تحت سقف واحد. سليم حرفيا كان مش طايقني، ووشه دايماً مقلوب في وشي، وقدام الناس وأهلنا بنمثّل دور العشاق وإننا أحلى وأسعد اتنين في الدنيا، لكن في الحقيقة المرة والواقع غير كده تماماً.
هو من النوع الهدئ اللي مش بيحب المشاكل وقليل الكلام وفي حاله طول الوقت، وأنا كمان شخصيتي هادية ومختصرة الناس كلها زيه. البيت طول فترة جوازنا كان هادي لدرجة يخوف مفيش خناق ولا صوت عالي ولا مشاكل أبدا بيننا، بس الهدوء ده بطبيعة الحال مكنش هيقعد لطول العمر ولازم ينفجر في يوم من الأيام.
وجه اليوم اللي قلب حياتنا دي رأس على عقب وخلى العالي واطي؛ كانت الساعة تلاتة الفجر, كنت نايمة عادي جداً في أوضتي وفجأة صحيت مرعوبة ومخضوضة بسبب إني كنت دايخة جدا وحاسة بإحساس فظيع إني عايزة أرجع كل اللي في بطني، وجسمي كله كان والعة ونازل عرق سخن. خرجت من الأوضة وأنا مسكا نفسي بالعافية وجريت على الحمام، وفضلت أرجع كذا مرة ورا بعض لحد ما حسيت روحي بتطلع. ولما فتحت باب الحمام وطلعت، لقيته هو كمان خارج من أوضته في نص الليل وشكلي المنيل ده لفت انتباهه ولاحظ أن فيا حاجة غلط ومش طبيعية.
بصلي بحدة وقال بصوت نايم:
* إنتي كويسة؟
رديت وأنا بترعش:
* اها.. أنا كو.. كويسة.
سألني بشك وهو بيكقق في عيني:
* متأكدة؟
هزيت راسي بسرعة:
* اه متأكدة.
قال ببرود:
* طيب.
ومشي من قدامي ودخل أوضته، بس نظرات عينه كانت بتقول ألف كلمة وإنه شاكك أساساً أن فيا حاجة خفية مخبياها عليه. وأنا دخلت أوضتي وأنا مرعوبة وخفيت عليه الحقيقة لغاية ما أفهم إيه الهبل اللي بيحصلي ده وجسمي ماله.
عدى يومين على الموقف ده، وكل يوم الصبح اصحى على نفس الكابوس والتعب; صاحية دايخة وراسي هتنفجر، وعندي رغبة غريبة عاوزة أثور وأتخانق مع أي حد قدامي من غير أي سبب، وكل شوية أرجع اللي في بطني، والأكل ده بقيت أكره سيرته وكل ما أششم ريحة طبخ نفسي تتقلب وأحس إن أي أكلة بقت تقيلة على معدتي كأنها طوبة.
مستحملتش، اتصلت بصحبتي المقربة يمكن تقول لي على دواء كويس يحل البلوة دي ويعدل دماغي:
* يا حبيبة أنا دايخة جدا ومش على بعضي ومن إمبارح وأنا شغالة ترجيع ومش قادرة أقف على رجلي.
صرخت في التليفون بفرحة عارمة:
* اللهووو… إنتي حامل يا أيلين!
قلت بصوت مصدوم:
* حامل إيه يا هبلة إنتي, لا مستحيل مستحيل اللي بتقوليه ده.
ردت بثقة عمياء:
* لا حامل يا عبيطة، دي كلها أعراض حمل واضحة زي الشمس، ألف مبروك يا روحي!
زعقت فيها:
* يا بنتي بقولك مستحيل، أنا متأكدة من نفسي!
قالت بسخرية:
* وإنتي متجوزة بقالك قد إيه ياختي؟ أكيد حامل طبعاً مالك مستغربة ليه!
قلت برفض:
* لا لا مستحيل، ممكن يكونوا شوية تعب عارضين أو أخدت برد شديد في معدتي لأني دايماً بسيب البلكونة مفتوحة وأنا نايمة بالليل!
قالت لي بحلفان:
* عليا الطلاق من جوزي إنتي حامل! أنا جاتلي نفس الأعراض حرفياً دي لما كنت حامل في بنتي رنا ومش هتبصي لورا.
جزيت على ضراعي وقلت بزهق:
* سيبك من الهبل ده دلوقتي، أنا كلمتك عشان عايزة اسم دواء كويس تخفف الدوخة اللي حاسة بيها دي وتوقف الترجيع ده لأني زهقت وتعبت بجد!
ردت بكل برود:
* اشربي أعشاب وحاجات سخنة ومع الوقت هتبقي كويسة، لكن الترجيع ده مستمر معاكي طول فترة الحمل يا فالحَة!
صرخت في الودن التانية:
* يا ربي! إنتي مصرة تطلعيني حامل بأي شكل من الأشكال وخلاص من غير ما تفهمي حاجة؟!
قالت بضحك:
* روحي اكشفي عند دكتورة وهتلاقي نفسك بتقولي إني قولتلك كلمة الحق وإنتي حامل فعلاً!
قفلت في وشها السكة من العصبية وقلت:
* طب غوري في داهية يلا، سلام!
قفلت معاها الموبايل وفضلت ألف حوالين نفسي وأفكر في كلامها بجنون؛ هل فعلاً اللي بيحصلي ده كله أعراض حمل؟ بس إزاي ده يحصل وأنا أصلاً متجوزة على الورق بس؟! دي غبية ومتعرفش حاجة عن نظام بيتنا، وفجأة لقيت باب أوضتي بيخبط خبطات خفيفة.
